Emisioni sportiv “Koha e Botërorit” vjen me episodin e radhës, ku u analizuan sfidat e para të fazës së grupeve dhe zhvillimet më të fundit nga futbolli ndërkombëtar.
Një nga temat kryesore të diskutimit ishte krahasimi mes dy yjeve të futbollit botëror, Lionel Messi dhe Cristiano Ronaldo. Ndërsa Messi ka realizuar tre gola në ndeshjet e para, Ronaldo ende nuk ka gjetur rrugën e rrjetës, duke u përballur me kritika të shumta për paraqitjet e tij me përfaqësuesen portugeze.
I ftuar në studio nga moderatori Rozalb Lika ishte gazetari sportiv Mantho Prokopi, i cili nuk ngurroi të shprehte bindjen e tij se Messi është futbollisti më i mirë në historinë e këtij sporti. Megjithatë, ai beson se Cristiano Ronaldo do të reagojë në vazhdim të turneut dhe se Portugalia ka potencialin për të arritur deri në finalen e madhe.
Sa i përket skuadrave favorite, Prokopi u shfaq skeptik për ecurinë e Gjermanisë dhe Brazilit, duke vlerësuar se Spanja dhe Franca janë ekipet që mund të shkojnë shumë larg në këtë kompeticion.
Gjatë emisionit u diskutua edhe për zhvillimet e fundit në merkaton e futbollit shqiptar, ku Egnatia ka qenë shumë aktive. Debatet, analizat dhe parashikimet për ecurinë e Botërorit vijojnë të mbeten në qendër të “Koha e Botërorit”, një emision që sjell diskutime të nxehta mbi futbollin dhe protagonistët e tij.