Konfirmohet dëmtimi i Locatellit, 3-6 muaj jashtë fushave

Juventusi merr një tjetër goditje të rëndë nga infermieria. Manuel Locatelli do t’i nënshtrohet operacionit në gju në Lion, me ndërhyrjen që pritet të kryhet gjatë orëve të ardhshme. Kapiteni bardhezi u dëmtua në përballjen e së dielës mbrëma ndaj Milanit dhe kontrollet e kryera fillimisht në J|Medical ngritën dyshime serioze për një dëmtim të meniskut.

Konsulta e zhvilluar këtë mëngjes në Lion me specialistin e njohur francez të gjurit, Bertrand Sonnery-Cottet, ka konfirmuar frikën e Juventusit: Locatelli ka pësuar këputje të meniskut të jashtëm dhe operacioni është i pashmangshëm.

Gjendja rezulton edhe më shqetësuese pas vizitës te specialisti francez. Në raste të tilla ekzistojnë dy mundësi kryesore gjatë ndërhyrjes: heqja e pjesës së dëmtuar të meniskut ose qepja e tij.

Kohëzgjatja e rikuperimit do të varet pikërisht nga lloji i ndërhyrjes që do të kryhet. Në skenarin më optimist, Locatelli mund të mungojë rreth tre muaj, ndërsa nëse menisku do të qepet dhe kërkohet një periudhë më e gjatë rehabilitimi, pushimi mund të shkojë deri në gjashtë muaj.

Për Juventusin e Luciano Spallettit bëhet fjalë për një goditje të madhe, pasi Locatelli është kapiteni dhe një prej pikave kryesore të mesfushës. Situata prek edhe kombëtaren italiane, e cila rrezikon të mbetet pa një prej lojtarëve të rëndësishëm për një periudhë të konsiderueshme.

Ndërhyrja e Locatellit do të zhvillohet këtë pasdite në Hôpital Privé Jean Mermoz, në Lion, ku operon specialisti Bertrand Sonnery-Cottet.

Bëhet fjalë për të njëjtin mjek që gjatë viteve të fundit ka trajtuar edhe futbollistë të tjerë të Juventusit, mes tyre Gleison Bremer për dëmtimin e ligamentit të kryqëzuar dhe meniskut, si dhe Federico Gatti për problemin në menisk.

Vetëm pak ditë më parë, Sonnery-Cottet kishte ndërhyrë edhe te Khephren Thuram, duke e bërë operacionin e Locatellit një tjetër kapitull të vështirë për Juventusin.