“Krisja” FSHF-De Biasi, zëdhënësja: Trajnerin e bëri të famshëm Kombëtarja

Duket se suksesi i kombëtares sonë, ka krijuar xhelozi në FSHF, sepse meritat  po i kalojnë më tepër trajnerit, Gianni de Biasi. Fakt është se rinovimi i paralajmëruar i kontratës me De Biasin, nuk është realizuar pas ndeshjeve me Danimarkën e Portugalinë, e madje rrezikon të mos realizohet edhe pas pas mbylljes së ndeshjeve eliminatore.

Zëdhënësja e Federatës Shqiptare të Futbollit reagoi pas deklaratës së presidentit Armando Duka, të mbajtur pas takimit me ambasadorin serb në Tiranë. Në faqen e saj në rrjetin social “Facebook”, zëdhënësja shkruan se merita nuk është vetëm e trajnerit De Biazi, por edhe e lojtarëve të Kombëtares, që bëjnë të mundur realizimin e skemave për fitore.

“Shoh që më kanë nxjerrë në media, ndaj dua të bëj një sqarim. Xhani De Biazi është trajneri i Kombëtares sonë, strategu i fitoreve dhe unë kam fatin të punoj me të, sepse ka ndikuar për ëndrrën tonë drejt Evropianit dhe unë dua t’i them ‘Grazie mister’ (‘Faleminderit zotëri’)!

Por, është njësoj e vërtetë dhe e ritheksoj që në vendin tonë, famën ose emrin ja ka dhënë Kombëtarja pikërisht si trajner i saj, sepse jo gjithnjë duhet vetëm skema, por sepse kemi lojtarë të zotë që luajnë si gladiatorë në realizimin e kësaj skeme! Mos më keqpërdoroni mënyrën si jam shprehur dhe atë ç’kam dashur të nënkuptoj! Forca #KuqEzi!”, thuhet në postimin e zëdhënëses për shtyp të Federatës Shqiptare të Futbollit.