Kristian Prenga sfidon Anthony Joshuan: Do ta nokautoj dhe do të trondis botën e boksit

Boksieri shqiptar i peshave të rënda, Kristian Prenga, është i bindur se do të shkaktojë surprizën më të madhe të vitit, teksa më 25 korrik do të përballet me ish-kampionin e dyfishtë të botës, Anthony Joshua, në Riad të Arabisë Saudite. Në një intervistë ekskluzive, Prenga deklaroi se britaniku ka bërë një gabim të madh duke pranuar këtë duel dhe se ndeshja do të përfundojë me nokaut në favor të tij.

“Ai bëri një gabim të madh që pranoi të ndeshet me mua dhe këtë do ta kuptojë në ring. Krahu im do të ngrihet lart pasi ta nokautoj Joshuan”, u shpreh 35-vjeçari shqiptar.

Prenga, i cili ka një bilanc prej 20 fitoresh dhe vetëm një humbjeje, me të gjitha fitoret e arritura me nokaut, tha se po stërvitet më fort se kurrë për sfidën më të rëndësishme të karrierës.

“Po punoj edhe më shumë, sepse fitorja ndaj Joshuas do të më afrojë me ëndrrën për t’u bërë kampioni i parë shqiptar i botës në peshat e rënda”, deklaroi ai.

Boksieri shqiptar theksoi se është krenar që do të përfaqësojë Shqipërinë në një event të këtij niveli.

“Të përfaqësosh Shqipërinë në një duel kaq të madh do t’i tregojë botës sa të fortë janë shqiptarët. Do të hyj në ring me gjithë Shqipërinë pas meje”, tha Prenga.

Ai beson se arma e tij më e fortë mbetet fuqia goditëse, veçanërisht dora e djathtë, dhe premton se do ta vendosë Joshuan në vështirësi.

“Kam fuqi dhe do të fitoj. Do ta detyroj të luftojë në kushte që nuk i pëlqejnë dhe më 25 korrik do të dal fitues”, u shpreh ai.

Dueli mes Prengës dhe Joshuas do të zhvillohet në “Jeddah Superdome” të Riadit. Për Prengën kjo është ndeshja më e rëndësishme e karrierës, ndërsa për Joshuan do të jetë paraqitja e pestë në Arabinë Saudite.

Në fund të intervistës, shqiptari u dërgoi një mesazh mbështetësve të tij.

“Faleminderit për mbështetjen ndër vite. Shikoni ndeshjen, sepse do ta trondis botën kur ta nokautoj Anthony Joshuan”, përfundoi Kristian Prenga.