Kukësi mund të mbetet në Kategorinë e Parë edhe në humbet finalen e “Play Out”

Kukësi ka mbyllur sezonin në Kategoria e Parë në vendin e dhjetë, duke u detyruar të luajë fatin e mbijetesës në finalen e “play-out”. Verilindorët do të përballen me Bylis B, në një ndeshje vendimtare për qëndrimin në kategori. Megjithatë, situata paraqitet e veçantë, pasi Kukësi ka dy skenarë për të siguruar mbijetesën.

Opsioni i parë është i drejtpërdrejtë: fitimi i finales së “play-out”. Por ekziston edhe një mundësi e dytë, që lidhet me fatin e Bylis Ballsh në Abissnet Superiore. Në rast se skuadra e parë e Bylisit bie nga kategoria elitare, atëherë ekipi B nuk mund të ngjitet në Kategorinë e Parë, edhe nëse fiton finalen ndaj Kukësit, pasi rregullorja nuk lejon që dy ekipe të të njëjtit klub të luajnë në të njëjtën kategori.

Aktualisht, Bylisi ndodhet në zonën e ftohtë të Superiores, duke mbajtur vendin e parafundit, çka e mban të hapur këtë skenar. Në këtë mënyrë, Kukësi shkon në sfidën e “play-out” me dy rrugë të hapura për mbijetesën, duke i dhënë ndeshjes një rëndësi të dyfishtë dhe një dimension të pazakontë në garën për qëndrimin në kategori.