Laçi-Partizani, trajneri Duro: Do të luajmë si ndaj një rivali për titull

Sporti E Diel, 18 Prill 2021 20:19

Partizani është gati për ta nisur me fitore pjesën e dytë të këtij sezoni, ndonëse kalendari i rezervon një ndeshje të vështirë përballë Laçit në transfertë. Rikthehet sot Kategoria Superiore, me ndeshjet e pjesës së dytë të garës. Ndeshja Laçi – Partizani do të zhvillohet të djelën, ora 14:00, ku për të kuqtë kryeqytetas kërkohet medoemos fitorja dhe trajneri Shpëtim Duro shprehet fakt pozitiv është se e ka grupin të plotë. Pas fazës përgatitore, që ndonëse e zhvilloi në Tiranë, trajneri i Partizanit mendon se skuadra është e freskët dhe gati ta nisë garën me pretendimet për titull. Merkato ka afruar emra të paktë gjatë dimrit, por lojtarët konsiderohen goditje të sakta prej tij. – “Kemi zhvilluar një fazë përgatitore mjaft pozitive dhe është shumë e rëndësishme që nuk kemi pasur asnjë dëmtim. Jemi gati për fazën e tretë ku do të gjejmë që në ndeshjen e parë një kundërshtar me vlera sikurse është edhe Laçi. Transfertën me këtë skuadër do ta konsiderojë një përballje rivalësh,” – thekson tekniku i të kuqve. Trajneri i Partizanit kërkon impenjim maksimal nga futbollistët e tij për të marrë maksimumin e pikëve në Laç, ndryshe ai druhet se mos ekipi i tij do të largohet nga rivalët, për të cilët thotë se kanë një kalendar më të lehtë dhe po ashtu edhe mundësinë që ta fitojnë ndeshjet. – “Nuk pres që rivalët tanë të lënë pikë, sepse realisht nuk kanë kundërshtarë. Prandaj duhet të japim gjithçka për të marrë maksimumin e pikëve ndaj Laçit.” Trajneri i Partizanit, Shpëtim Duro sqaroi edhe tratativat e blerjes së sulmuesit të kombëtares së Lituanisë, Darvydas Sernas, që është goditja e fundit në merkato. – “Të them të vërtetën Sernas është një futbollist i ofruar nga kompania menaxheriale e Partizanit, pra nuk është se e kam kërkuar unë, por mendoj se është me vlera sepse ka qenë në aktivitet,” – shprehet trajneri i Partizanit. Pjesa e dytë e Kategorisë Superiore nis sot me ndeshjes Tirana-Apolonia, që do të luhet në “Niko Dovana” të Durrësit. Po sot Kukësi që kryeson pa spjesës së parë të këtij sezoni, do të luajë në Shkodër, ndaj Vllaznisë vendase, ndërsa Flamurtari pret Teutën.