Laçi shkatërron Bylisin dhe blindon vendin e tretë në renditje

Laçi vijon të dhurojë spektakël në Superiore, teksa sot ka marrë një fitore të lehtë 3-0 kundër Bylisit. Ekipi kurbinas dominoi sfidën në Ballsh dhe mposhti Hidin 3 herë me dy-golëshin e Nwabuezes dhe Rapos në fundin e pjesë së parë.

Sfida nisi mirë për laçianët që fituan një penallti me Abdurrahman Fangajn. Mbrojtësi u pengua në zonë nga Ndreca dhe ekzekutimin e saj e mori përsipër sulmuesi Nwabueze, i cili nuk do të gabonte. Kur mendohej se pjesa e parë do të mbyllej me këtë rezultat ishte Rapo që shënoi për 0-2. Golashënuesi mori një krosim të mirë nga krahu i djathtë dhe me të majtën e çoi në rrjetë. Pjesa e dytë pa sërish Laçin më kërkues.

Ekipi i trajnerit Armando Cungu arriti të gjente dhe golin e tretë sërish me sulmuesin Nwabueze në minutën e 75-të. Me këtë fitore kurbinasit blindojnë vendin e tretë në renditje me 58 pikë, 4 më shumë se Skënderbeu dhe 5 më shumë se Teuta e vendit të katërt.