Një zbulim i gazetës Il Mattino ka ndezur alarmin në ambientin napolitan: Kevin De Bruyne mund t’i japë lamtumirën Napolit që në merkaton e janarit. Mesfushori belg po vuan një dëmtim më serioz nga sa ishte parashikuar fillimisht dhe rikthimi i tij në fushë pritet të mos ndodhë para fundit të shkurtit.
Në moshën 34-vjeçare, ish-ylli i Manchester City nuk dëshiron të marrë rreziqe të panevojshme, sidomos duke pasur parasysh se në verë pritet të marrë pjesë në Botërorin e fundit të karrierës së tij. Aktualisht nuk ka një datë të saktë për rikthimin e tij dhe, edhe kur të jetë në dispozicion të trajnerit Antonio Conte, De Bruyne do të ketë nevojë për kohë shtesë për të rifituar ritmin e ndeshjeve dhe besimin fizik.
Sipas burimeve pranë klubit, bëhet fjalë për muaj dhe jo për javë rikuperimi. Për këtë arsye, me merkaton dimërore tashmë të hapur, Napoli po shqyrton seriozisht mundësinë e pranimit të ofertave që mund të vijnë nga Arabia Saudite.
