
Pas një periudhe të gjatë dhe të vështirë larg futbollit, Medon Berisha është shumë pranë rikthimit në fushën e lojës. Mesfushori i Kombëtares shqiptare duket se ka lënë pas dëmtimin serioz që e ka mbajtur jashtë për pothuajse një vit, duke sjellë optimizëm si te Lecce, ashtu edhe te kuqezinjtë.
Futbollisti 22-vjeçar nuk ka luajtur që prej 12 dhjetorit 2025, kur pësoi një dëmtim të rëndë në tendinën e muskulit rectus femoris të kofshës së djathtë. Ndërhyrja kirurgjikale dhe vështirësitë gjatë rikuperimit bënë që mungesa e tij të zgjatej shumë më tepër nga sa ishte parashikuar fillimisht.
Madje, presidenti i Lecce-s, Saverio Sticchi Damiani, kishte pranuar se procesi i rikuperimit ishte shoqëruar me vështirësi dhe se ecuria kishte qenë më e ngadaltë nga sa priste klubi.
Megjithatë, tashmë vjen sinjali pozitiv. Sipas mediave italiane, Berisha ka rifilluar stërvitjen me grupin dhe mund të jetë së shpejti në dispozicion të trajnerit Eusebio Di Francesco. Ekziston edhe mundësia që mesfushori shqiptar të përfshihet në listën e të grumbulluarve për transfertën ndaj Lazios, më 21 nëntor.
Rikthimi i tij do të ishte një përforcim i rëndësishëm për Lecce-n, por edhe një lajm i shumëpritur për Kombëtaren shqiptare. Berisha ofron alternativa të shumta në mesfushë, falë aftësisë për të luajtur në disa pozicione.
Tashmë, pas gati një viti mungesë, objektivi i parë është rikthimi gradual në ritmin e ndeshjeve dhe lënia përfundimisht pas e kësaj periudhe të vështirë.
