Lazio nuk ka ndërmend që të heq dorë nga Marash Kumbulla. 10 ditë më parë klubi bardhekaltër pati një takim me presidentin e Veronës për të diskutuar për transferimin e futbollistit të kombëtares sonë te ekipi bardhekaltër.
Së fundmi, raportohet se drejtuesit e klubit kryeqytetas duan t’i ofrojnë Veronës sulmuesin e vet Andre Anderson, i cili është huazuar te Salernitana. Lajmi bëhet me dije nga media italiane “Tuttosport”, që shton se ky opsion shkëmbimi mes klubeve është mëse i realizueshëm. Lazio synon të paguajë 20 milionë euro dhe kartonin e sulmuesit.
Marash Kumbulla është kthyer në shënjestrën e shumë klubeve të mëdha, por prej disa javësh Lazio po intensifikon përpjekjet për ta blerë qendërmbrojtësin 20-vjeçar. Inter dhe Juventus nuk janë dorëzuar, teksa nuk mund të përjashtohet mundësia që në javët në vijim të kemi një tjetër tentativë nga dy klubet e mëdha, që kanë mundësi më të mëdha financiare për të bërë realitet synimet e tyre në merkato. Tare është i bindur se do të arrijë që të bindë shkodranin që t’i bashkohet kolonisë shqiptare.
