Lazio vë në shënjestër Armando Brojën, mund të jetë shans i artë për bomberin e Kombëtares

Teksa pritet vetëm zyrtarizimi i emërimit të Gennaro Gattusos në krye të Lazios, drejtuesit e klubit kryeqytetas kanë nisur punën për ndërtimin e skuadrës së sezonit të ardhshëm.

Një nga repartet që pritet të pësojë ndryshime është sulmi, ku bardhekaltërit po analizojnë disa alternativa për të përforcuar organikën. Sipas raportimeve të mediave italiane, emri i sulmuesit shqiptar Armando Broja është ndër më të pëlqyerit nga drejtuesit e Lazios.

Broja, i cili aktualisht është pjesë e Burnley, mund të largohet gjatë merkatos së verës pas rënies së klubit anglez në Championship. Kjo situatë ka rritur interesimin e disa skuadrave europiane, ndërsa Lazio po monitoron me kujdes zhvillimet.

Sipas burimeve pranë klubit, Burnley kërkon rreth 12 milionë euro për kartonin e sulmuesit shqiptar. Megjithatë, palët mund të gjejnë një zgjidhje edhe përmes formulës së huazimit, opsion që do ta bënte operacionin më të përballueshëm për klubin italian.

Në listën e alternativave për repartin ofensiv figuron edhe emri i Sebastiano Esposito, sulmuesit të Cagliarit, por Broja mbetet një nga profilet që po ndiqet me interes të veçantë.

Nëse transferimi realizohet, sulmuesi i Kombëtares shqiptare do të kishte mundësinë të rikthehej në elitën e futbollit europian dhe të provonte një aventurë të re në Serie A, nën drejtimin e Gennaro Gattusos.