Një duel i mundshëm mes Lionel Messit dhe Cristiano Ronaldos në çerekfinalet e Kupës së Botës do të ishte momenti ideal për të kurorëzuar spektaklin që po ofron ky turne. Kështu u shpreh Ledio Pano gjatë emisionit “Koha e Botërorit”, teksa komentoi mundësinë e një përballjeje historike mes dy prej futbollistëve më të mëdhenj të të gjitha kohërave.
Sipas Panos, një ndeshje e tillë do të kishte vlera të jashtëzakonshme jo vetëm nga ana sportive, por edhe historike dhe statistikore.
“Nga ana e bukurisë, nga ana statistikore dhe nga ana historike, do të ishte ideale”, deklaroi ai.
Ish-futbollisti vlerësoi lart kontributin e Messit dhe Ronaldos në futbollin botëror, duke theksuar se tifozët duhet të ndihen me fat që kanë pasur mundësinë t’i shohin në fushën e lojës.
“Janë dy lojtarë për të cilët duhet të jemi krenarë që i kemi parë të luajnë. Kam pasur fatin të ndjek nga afër epoka të ndryshme të futbollit, që nga Maradona, Gjermania e madhe e viteve të kaluara, Franca e Platinit, Brazili, Holanda me Gullit, Van Basten dhe Rijkaard, Italia e vitit 1982, Franca e Zidane apo Brazili i vitit 2002 me Ronaldon dhe Rivaldon”, u shpreh Pano.
Në fund, ai nënvizoi se Messi dhe Ronaldo kanë fituar tashmë një vend të veçantë në historinë e futbollit dhe se një përballje direkte mes tyre në skenën më të madhe të futbollit botëror do të ishte një dhuratë e rrallë për tifozët në mbarë globin.
Emisioni i plotë: https://youtu.be/WJdctKQKkRs