Leipzig shkatërron me 5 gola Mainz-in, Werner shkëlqen me tripletë (VIDEO)

Sporti E Diel, 24 Maj 2020 18:15

Leipzig është rikthyer në rrugën e fitoreve në Bundesligë, duke shkatërruar 5-0 Mainz-in. Sulmuesi gjerman Timo Werner ishte protagonist i padiskutueshëm, pasi arriti të dërgojë topin në rrjetë plot tre herë dhe të shkojë në kuotën e 24 golave sezonal, vetëm 3 më pak se kryegolashënuesi i kampionatit ,Robert Lewandowski.

Werner zhbllokoi sfidën që në minutën e 11-të, ndërsa Poulsen dhe Sabitzer shënuan gjithashtu në portën e Mainz, duke vulosur suksesin e Leipzig që në 45-minutëshin e parë të takimit.

Werner nuk kishte ndërmend të ndalej, pasi në pjesën e dytë shënoi edhe dy herë të tjera, gola këta që i vlejnë më shumë për statistikat personale. Me këtë triumf, Leipzig u ngjit në vendin e tretë me 54 pikë, 7 më pak se Bayern Munich që kryeson renditjen.