LIGA E KAMPIONËVE – Paris, natë terrori! Përleshje, vjedhje, të plagosur dhe 416 arrestime pas triumfit të PSG-së

Nata e festës së triumfit të Paris Saint-Germain në Ligën e Kampionëve u kthye në kaos në Paris, me përleshje, vjedhje dhe arrestime masive. Ajo që shpesh shoqëron festimet e mëdha të PSG-së, edhe këtë herë nuk mungoi, duke lënë pas një bilanc të rëndë. Ndërsa shumica e tifozëve festuan me gëzim fitoren e dytë në Champions League, problemet e rendit publik ishin të shumta.

Bilanci i natës shënoi 416 arrestime në të gjithë territorin kombëtar, nga të cilat 283 vetëm në kryeqytet. Nuk munguan as vjedhjet dhe plaçkitjet, veçanërisht në zonën e Champs Elysées, ku u mblodh një numër i madh tifozësh menjëherë pas vërshëllimës finale të ndeshjes në Budapest. Mes tifozëve paqësorë u përziejnë individë të dhunshëm, të cilët madje tentuan të sulmonin një komisariat policie në lagje.

Tensionet u shtrinë edhe rreth Parc des Princes, i cili ishte hapur për 48 mijë tifozë për të ndjekur finalen në ekran të madh. Policia ndërhyri për të shpërndarë huliganët që kishin ngritur barrikada, duke djegur biçikleta elektrike të grumbulluara me materiale ndërtimi dhe duke bllokuar rrugën rrethore. Fishekzjarre dhe mjete piroteknike u përdorën gjithashtu për të sulmuar forcat e rendit, të cilat u përgjigjën me gaz lotsjellës dhe ndërhyrje.

Si pasojë e trazirave, shtatë agjentë policie mbetën të plagosur. Numri i arrestimeve në Paris arriti pothuajse treqind, ku shtatë gjyqtarë po punojnë me kohë të plotë për procedurat e mundshme gjyqësore. Për festimet e ardhshme, ku heronjtë parizianë pritet të prezantojnë kupën nën Kullën Eiffel para 100 mijë tifozëve dhe më pas të priten nga Presidenti i Republikës, Ministria e Brendshme ka parashikuar dislokimin e 5.790 agjentëve dhe 2.500 zjarrfikësve.

Marrë nga La Gazzetta dello Sport