Lisandro Martinez kërkon falje pasi kritikoi drejtuesit, por edhe gjobitet nga klubi

Mbrojtësi argjentinas pranon gabimin pas kritikave ndaj drejtuesve të “Djajve të Kuq”. Klubi e ka ndëshkuar me gjobë, ndërsa Manchester United përgatitet për derbin delikat ndaj Leeds United.

Lisandro Martinez ka kërkuar falje zyrtarisht pas polemikave të shkaktuara nga deklaratat e tij të fundit kundër drejtuesve të Manchester United. Mbrojtësi argjentinas kritikoi drejtuesit e klubit pas humbjes në Champions League ndaj Atletico Madridit, duke pretenduar se trajnerit Michael Carrick nuk i ishte vënë në dispozicion një skuadër e përshtatshme për objektivat e ekipit.

Deklaratat e futbollistit shkaktuan reagime të forta brenda klubit dhe, si pasojë, Martinez u ndëshkua me një gjobë zyrtare nga drejtuesit e Manchester United.

Pas një takimi me përfaqësuesit e klubit dhe trajnerin Michael Carrick, kampioni i botës vendosi të tërhiqte deklaratat e tij, duke kërkuar falje publikisht përmes rrjeteve sociale.

“Kam zhvilluar një bisedë shumë pozitive me drejtuesit dhe trajnerin. Ishte një moment diskutimi të hapur. Kërkoj falje. Jam një person që i përjeton gjërat me shumë pasion dhe zhgënjimi pas humbjes më bëri t’i shpreh ndjenjat e mia në momentin dhe vendin e gabuar”, deklaroi Martinez.

Kjo çështje vjen në një moment delikat për Manchester United, që po përgatitet për përballjen ndaj Leeds United në stadiumin “Elland Road”. Derbi konsiderohet një sfidë e rëndësishme për skuadrën e Carrick, e cila po kalon një periudhë të vështirë.