Lista e Kombëtares, Maran zbulon arsyet e mungesës së Brojës dhe Bajramit

Trajneri i Kombëtares shqiptare, Rolando Maran, ka publikuar listën e lojtarëve të grumbulluar për katër ndeshjet e ardhshme në Ligën e Kombeve. Në prononcimin e tij pas shpalljes së listës, Maran ka shpjeguar disa prej zgjedhjeve të bëra, përfshirë mungesën e Armando Brojës dhe Nedim Bajramit, ndërsa ka folur edhe për afrimet e reja, Kerjotën dhe Sinën.

Teksa komentoi përzgjedhjen e portierëve, trajneri italian u ndal te Etrit Berisha, duke theksuar se dëmtimi i Thomas Strakoshës ka ndikuar në vendimin për listën. “Kam marrë në konsideratë shumë faktorë gjatë hartimit të listës. Jam bazuar te monitorimi që kam bërë dhe te ajo që lojtarët kanë treguar gjatë javëve të fundit. Berisha është një portier me cilësi të mira dhe, duke pasur parasysh dëmtimin e Strakoshës, kam bërë zgjedhjen time”, u shpreh Maran.

Sa i përket Brojës dhe Bajramit, trajneri tha se i ka ndjekur nga afër zhvillimet e tyre të fundit, por theksoi se mungesa në këtë grumbullim nuk nënkupton mbylljen e derës së Kombëtares. “Për Brojën dhe Bajramin kam parë zhvillimet e tyre të fundit, por kjo nuk do të thotë se dera e Kombëtares është e mbyllur”, tha ai.

Maran foli gjithashtu për Kerjotën, i cili është përfshirë në listë pas paraqitjeve të tij gjatë sezonit të kaluar. “E kemi vëzhguar që në sezonin e shkuar, ku ka qenë protagonist. Për pak sa nuk u shpall kampion dhe është një lojtar që mund të na ndihmojë. Është e vështirë të ndjekësh lojtarët në çdo vend ku luajnë, ndaj kam vendosur ta sjell këtu”, deklaroi trajneri.

Ndërkohë, për Sinën, Maran tha se është një emër që është evidentuar gjatë periudhës së fundit dhe se grumbullimi i tij lidhet edhe me mungesat që ka pasur Kombëtarja. “Sina është evidentuar kohët e fundit dhe është një lojtar i vlefshëm për ne. Kemi pasur disa mungesa dhe për këtë arsye është me ne. Në të ardhmen do të shohim nëse do të vazhdojë me Kombëtaren A apo me U-21”, përfundoi Maran.