Liverpool dhe Slot ndahen, Iraola kandidat kryesor për stolin e “Reds”

Saga e trajnerit Arne Slot ka marrë fund. Klubi i Liverpoolit ka marrë vendimin për të larguar Arne Slot nga posti i trajnerit të skuadrës “red”. Ky sekret i hapur, që qarkullonte si thashethem gjatë gjithë sezonit, u konfirmua këtë të shtunë. Liverpool i jep fund një marrëdhënieje dy-sezonale me Arne Slot në krye të ekipit anglez. Gjatë kësaj periudhe, ai arriti të shpallej kampion i Premier League në sezonin e tij të parë, 2024-25, pasi iu bashkua klubit në qershor 2024, duke u emëruar edhe Trajner i Vitit nga LMA. Ai gjithashtu e udhëhoqi ekipin në finalen e Kupës Carabao dhe në çerekfinalet e Champions League. Në sezonin 2025-26, ai siguroi kualifikimin për Champions League për të dytin sezon radhazi, ku “Reds” arritën sërish në çerekfinale. Ish-tekniku i Feyenoord e mbyll aventurën e tij në Angli me një bilanc prej 66 fitoresh, 18 barazimesh dhe 29 humbjesh.

Pas një vere me investime të mëdha në tregun e transferimeve, sezoni i skuadrës “red” përfundoi duke qenë zhgënjyes. 481 milionë euro të investuara në yje si Isak apo Wirtz nuk u përkthyen në trofe. Përkundrazi, Liverpool e mbylli sezonin larg objektivave, duke u renditur i 5-ti në Premier League, duke arritur në çerekfinale në Champions League dhe Carabao Cup, si dhe duke rënë në raundin e parë në FA Cup.

Në një deklaratë të përbashkët, pronarët e Liverpool theksuan vlerësimin e tyre për suksesin që Arne solli në klub dhe për udhëheqjen e treguar gjatë dy viteve të tij në krye. Ata theksuan se ishte një vendim i vështirë për klubin, por kontributi i Slot ishte “i rëndësishëm, i vlefshëm dhe, më e rëndësishmja për tifozët dhe për ne, një sukses”. Klubi shprehu mirënjohjen e thellë për gjithçka që ai arriti, duke vënë në dukje etikën e tij të punës, zellin dhe nivelin e ekspertizës. Që në takimin e parë, ishte e qartë se Slot ishte një person që jo vetëm pranonte përgjegjësinë, por e merrte atë me pasion, gjë që u dëshmua gjatë fitores së titullit të Premier League dhe përballjes me sfidat e sezonit të fundit.

Megjithatë, pronarët arritën kolektivisht në përfundimin se ndryshimi ishte i nevojshëm që klubi të vazhdonte përpara. Ata theksuan se ky nuk ishte një vendim i marrë lehtë. Klubi dëshiron të shprehë mirënjohjen e tij për Arne, i cili do të zërë gjithmonë një vend të veçantë në historinë e klubit si trajneri që i solli Liverpoolit titullin e 20-të të ligës. Ky arritje, veçanërisht e shquar pasi ndodhi në sezonin e tij të parë, u bazua në stërvitje dhe udhëheqje të jashtëzakonshme. Ai gjithashtu ndihmoi klubin të kalonte një nga periudhat më të vështira të imagjinueshme pas humbjes së Diogo, duke treguar dhembshuri dhe humanizëm. Klubi i uron Slotit më të mirat në fazën tjetër të karrierës së tij, duke besuar se trashëgimia e tij në Liverpool mbetet e paprekur.

Përfundimi i arritur bazohet në bindjen se mënyra më e mirë për të adresuar trajektoren e ekipit është përmes një ndryshimi kursi. Kjo nuk ul meritat e punës së Arne, as respektin që klubi ka për të, dhe as nuk reflekton talentin e tij, por tregon nevojën për një qasje tjetër. Arne largohet me falënderimet e klubit, me një titull të Premier League në emër të tij dhe me sigurinë se ai dhe familja e tij do të jenë gjithmonë të mirëpritur në Anfield. Pas konfirmimit të largimit të trajnerit holandez, “procesi për emërimin e pasardhësit të tij tashmë ka filluar”, siç thuhet në deklaratën e klubit. Sipas bashkëpunëtorit të MARCA, Matteo Moretto, Andoni Iraola pozicionohet si kandidat i qartë për të zënë stolin e Anfield. Trajneri bask, i kërkuar nga disa klube si Bayer Leverkusen, AC Milan dhe Crystal Palace, ka qenë gjithmonë i lidhur me klubin “red” që kur u rritën thashethemet për largimin e Arne Slot.

Marrë nga Marca Premier