Liverpooli pëson humbjen e tretë radhazi, mundet me përmbysje nga “Dhelprat” (VIDEO)

Liverpooli nuk di të fitojë më në Premier League. Skuadra e Jurgen Klopp ka pësuar humbjen e tretë radhazi në kampionat 3-1 ndaj Leicester, teksa tashmë rrezikon dhe vendin e katërt.

Të Kuqtë në fakt do të kalonin të parët në avantazh në minutën e 67-të me Salah, që konkretizoi mjaft mirë një pasim me thembër nga Firmino. Leicester nuk dorëzohet dhe reagon mjaft mirë pas këtij goli.

“Dhelprat” përmbysën gjithçka në harkun e 3 minutave. Në minutën e 78-të, Maddison shënoi pas një goditje të lirë që nuk u devijua nga askush në zonë. Më pas do të vinte dhe një gol i shënuar nga Jamie Vardy, i cili përfitoi nga një dalje e gabuar e Alisson.

Në minutën e 85-të, Leicester vulosi fitoren me Barnes që përfitoi nga një rreshtim i gabuar i mbrojtjes. Me këtë fitore “Dhelprat” ngjiten në vendin e dytë me 46 pikë, 4 më pak se City, por ka zhvilluar dy sfida më shumë. /R.Lika-Koha Jone/