“Lojtari perfekt për United”, mesfushori i Juventusit drejt largimit?

Aaron Ramsey ishte një ndër përforcimet e Juventusit në mesfushë. Uellsiani erdhi me parametra zero nga Arsenali dhe deri tani nuk ia ka dalë të përshtatet siç duhet me futbollin italian dhe skemat e Maurizio Sarrit.

29-vjeçari ka shënuar dy gola këtë sezon me skuadrën e Sarrit dhe në verë mund të ndodhë rikthimi në Premier League. “Ramsey do të ishte perfekt për Manchester United“, është shprehur Tony Cascarino, ish-sulmues i Chelsea, aktualisht gazetar i Times.

Shitja e lojtarit të kombëtares uellsiane në fund të sezonit do të mbushte arkat e bardhezinjve, të cilët do t’i shpenzonin këto para për blerjen e ndonjë mesfushori tjetër.