Luis Henrique drejt largimit? Interi gati të hidhet në sulm për emra të rinj

Interi vazhdon të ndjekë me interes mesfushorin e Liverpoolit, Curtis Jones, i cili konsiderohet një nga objektivat kryesorë të klubit për të përforcuar mesfushën me një profil ndryshe nga lojtarët aktualë.

Megjithatë, çdo hap konkret për anglezin varet nga e ardhmja e Luis Henrique. Pas afrimit të Djed Spence, i cili pritet të marrë vendin e titullarit në krahun e djathtë, hapësirat për brazilianin janë ngushtuar ndjeshëm. Në krahun e majtë, Interi ka tashmë Federico Dimarco dhe Carlos Augusto, çka e bën edhe më të vështirë gjetjen e minutave për 24-vjeçarin.

Sezonin e kaluar, Luis Henrique zhvilloi 43 ndeshje në të gjitha kompeticionet, duke përfituar edhe nga mungesa e Dumfries për shkak dëmtimi, por këtë edicion situata pritet të jetë ndryshe.

Roma mbetet një nga klubet e interesuara për brazilianin, edhe pse aktualisht drejtuesit verdhekuq janë të fokusuar te afrimi i një lojtari me tipare më sulmuese, duke lënë në pritje bisedimet me Interin.

Nëse Luis Henrique transferohet, Interi do të krijonte hapësirën financiare për të tentuar afrimin e Curtis Jones. Përveç mesfushorit të Liverpoolit, zikaltërit po vlerësojnë edhe mundësinë e blerjes së një lojtari tjetër ofensiv, me kosto më të ulët, i aftë të aktivizohet në të dy krahët dhe të shtojë alternativat në repartin sulmues.

Për momentin, merkatoja e Interit mbetet e lidhur ngushtë me të ardhmen e Luis Henrique, largimi i të cilit mund të hapë rrugën për lëvizje të rëndësishme në skuadrën zikaltër.