Maldini kundër Cardinales: “Nuk jam ‘one man show’, ai e di vetë”

Ish-drejtori teknik i Milanit, Paolo Maldini, i është përgjigjur me ironi pronarit të klubit, Gerry Cardinale, i cili e kishte cilësuar atë si një “one man show” dhe jo të aftë për të punuar në ekip. “I përgjigjet vetes,” tha Maldini me buzëqeshje para mediave, ndërsa ndodhej në selinë e Sky për “Sky Inclusion Days”, ku firmosi autografe dhe bëri selfie me tifozët e shumtë.

Ish-kapiteni kuqezi më pas shmangu pyetjet rreth një të ardhmeje të mundshme në Kombëtare, por nuk e përjashtoi mundësinë e kalimit te Fenerbahçe. Kjo vjen pas takimeve të tij në Stamboll me kandidatin për president, Hakan Safi, me të cilin publikoi edhe një foto në Instagram.

Maldini theksoi se Safi është “një mik, një nga kandidatët për president, do të shohim se çfarë do të ndodhë nëse ai fiton.” Kjo deklaratë lë të hapur derën për një angazhim të mundshëm në klubin turk, në varësi të rezultatit të zgjedhjeve presidenciale.

Marrë nga La Gazzetta dello Sport