Mamurrasi 10 gola, Tërbuni ndalet, Bylis i lë kreun Lushnjës

Sporti E Diel, 18 Prill 2021 22:51

Java e 24-ët e Kategorisë së Parë ka sjellë rezultate të papritura. Gjithashtu një fitore tenistike 10-0, ashtu si ajo e javës së kaluar mes Bylisit dhe Tomorit. Mamurrasi në Grupin A ka mposhtur me të njëjtin rezultat në shtëpi Veleçikun. Kjo fitore Mamurrasit i jep shpresë, pasi edhe rivalët e Tërbunit janë ndalur në barazim 0-0 ndaj Ilirisë në një ndeshje të mbushur me tension ku janë nxjerrë 6 kartonë të kuq. Pukjanët pretendojnë se Mamurrasi "pagoi" Ilirinë që të luante ashpër dhe të frenonte ekipin e tyre, madje akuzojnë edhe gjyqtarin e ndeshjes. Diferenca pas këtyre rezultateve, me vendin e parë është vetëm 2 pikë. Ndërkohë Besëlidhja ka realizuar në minutën e fundit të lojës, duke e mbyllur takimin me fitore minimale 0-1.

Në Grupin B spikat fitorja në transfertë e Lushnjës ndaj Tomorit me rezultatin, 1-0. Golin për lagunarët e shënoi Mikel Canka. Bylis humbi me Sopotin 3-2, duke lënë kryesimin. Edhe kjo ndeshje ishte e tensionuar dhe e kontestuar. Ballshiotët pas ndeshjes pretendojnë gjithashtu se Sopoti aktivizoi jë lojtar të s'kualifikuar, ndaj duan tre pikët në ttavolinë. Gjithsesi Lushnja në kuotën e 47 pikëve, tashmë marshon e vetme drejt Superiores.