Pas humbjes 2-1 ndaj Finlandës në Helsinki, Shqipëria kërkon të reagojë menjëherë dhe të rikthehet te fitorja në sfidën e radhës përballë San Marinos.
Në prag të kësaj përballjeje, sulmuesi i Kombëtares, Rey Manaj, theksoi se kuqezinjtë duhet të hyjnë në fushë me një qasje agresive, me synimin për ta vendosur ndeshjen nën kontroll që në minutat e para.
“Me San Marinon varet si e marrim ndeshjen. Është një ekip shumë më i dobët se ne, por duhet parë se si do të shkojnë gjërat në fushë. Do të futemi që ta mbyllim direkt ndeshjen dhe të marrim tri pikët”, u shpreh Manaj.
Sulmuesi shqiptar theksoi se statistikat kanë më pak rëndësi për ekipin, pasi fokusi kryesor është te realizimi i golave dhe puna në aksionet sulmuese.
“Për ne e rëndësishme është që të bëjmë gola. Punojmë në aksione. Shpresoj të kemi fat dhe t’ju bëjmë të lumtur duke i shënuar golat me aksione”, tha ai.
Manaj foli edhe për trajnerin dhe idetë e tij, duke nënvizuar se skuadra po përshtatet gjithnjë e më shumë me kërkesat e stafit teknik.
“Besoj se trajneri ka shumë pak kohë, por idetë i ka të qarta. Të gjithë lojtarët e ndjekin. Absolutisht që çdo kohë që kalon është më mirë për ne. Shpresoj të jemi 100% kur të fillojnë kualifikueset e Europianit”, u shpreh sulmuesi.
I pyetur për objektivin personal, Manaj u shfaq i qartë se prioriteti është suksesi i skuadrës dhe jo golat e tij.
“Sa më shumë gola të bëjmë, aq më të lumtur do të jemi. Duhet të futemi në fushë duke menduar që të shënojmë që nga fillimi. Gjëja më kryesore është që të sulmojmë fort e ta mbyllim ndeshjen”, deklaroi ai.
Në fund, Manaj vlerësoi atmosferën brenda grupit të Kombëtares, duke theksuar se konkurrenca dhe bashkëpunimi mes lojtarëve janë në nivele të mira.
“Grupi është shumë i mirë. Është përmirësuar shumë. Çdo lojtar që do të luajë, do më të mirën e ekipit. Jam i lumtur që të luaj me cilindo lojtar”, tha Manaj.
Sa i përket dëshirës për të shënuar, sulmuesi pranoi se do të dëshironte ta gjente rrjetën ndaj San Marinos, por theksoi se më e rëndësishmja është marrja e tri pikëve.
“Dëshira do të ishte e madhe që ta thyeja në këtë ndeshje. Rëndësia është që të marrim tri pikë. Pastaj kush i bën golat, s’ka rëndësi. Tani gjërat po ecin shumë mirë dhe shpresoj të vazhdojnë kështu”, përfundoi Manaj.