Manchester City gjen zëvendësuesin e Rodrit, Bouaddi bëhet “qytetar”

Manchester City ka zyrtarizuar transferimin e Ayyoub Bouaddi, mesfushorit të talentuar francez që vjen nga Lille dhe shihet si një nga investimet kryesore të klubit për të ardhmen.

Futbollisti i lindur në vitin 2007 ka firmosur një kontratë afatgjatë me klubin anglez, e vlefshme deri në vitin 2031. Për kartonin e tij, Manchester City do t’i paguajë Lille rreth 95 milionë euro, ndërsa marrëveshja përfshin edhe 5 milionë euro të tjera në formë bonusesh.

Bouaddi pritet të jetë një nga alternativat kryesore për të mbuluar hapësirën e lënë pas nga Rodri, i cili u largua nga Manchester City. Pas zyrtarizimit, 18-vjeçari nuk e fshehu emocionin për transferimin në Premier League.

“Është një ditë shumë e veçantë për mua dhe familjen time. Manchester City është, për mua, klubi më i mirë në botë. Është një ëndërr të jem këtu dhe të mund ta quaj veten lojtar të Cityt”, deklaroi Bouaddi.

Mesfushori francez tregoi se ka ndjekur prej vitesh klubin anglez dhe është admirues i filozofisë së tij të lojës.

“E kam ndjekur Cityn për shumë vite dhe më pëlqen shumë mënyra se si luajnë. Klubi kërkon gjithmonë futboll cilësor dhe ka treguar se di të fitojë. Ky është një klub i ndërtuar për trofe”, u shpreh ai.