Manchester City nuk ndalet në merkato, arrin marrëveshje me Allan nga Palmeiras

Manchester City vijon të jetë një nga klubet më aktive në merkaton e verës. Pas investimeve të mëdha për rinovimin e skuadrës, kampionët anglezë kanë hedhur tashmë sytë nga Brazili, ku kanë arritur marrëveshjen për një tjetër talent të së ardhmes.

Manchester City po ndërton një skuadër të re, pa hequr dorë nga ambiciet për të qenë konkurrues menjëherë. Klubi anglez ka shpenzuar rreth 180 milionë euro për përforcimet e kësaj vere, duke u fokusuar kryesisht te futbollistë të rinj dhe me potencial të madh.

Transferimi më i kushtueshëm deri tani është ai i Elliot Anderson, i cili mbërriti nga Nottingham Forest për rreth 135 milionë euro. City ka investuar gjithashtu 25 milionë euro për Mathys Detourbet të Troyes dhe 11.7 milionë euro për Jeremy Monga të Leicesterit.

Në skuadër janë afruar edhe portierët Gerónimo Rulli dhe Pierce Charles. Mesatarja e moshës së lojtarëve të rinj të afruar është vetëm 22.2 vjeç, një tjetër dëshmi se drejtuesit e Cityt po punojnë për të ndërtuar bazat e një cikli të ri. Sipas raportimeve të ESPN Brasil, Manchester City ka arritur marrëveshjen me Palmeiras për transferimin e Allan Elias, mesfushorit brazilian të lindur në vitin 2004.

Operacioni do t’i kushtojë klubit anglez rreth 40 milionë euro: 37.5 milionë euro si shumë fikse dhe 2.5 milionë të tjera në formën e bonuseve, të lidhura me objektivat e lojtarit dhe klubit. Allan është një mesfushor shumëfunksional, i aftë të luajë në disa pozicione dhe është shndërruar në një lojtar të rëndësishëm për trajnerin Abel Ferreira te Palmeiras.

Braziliani largohet nga klubi pas 96 ndeshjeve zyrtare, me një bilanc prej 9 golash dhe 12 asistimesh. Ai e ka zhvilluar tashmë ndeshjen e fundit me fanellën e Palmeiras, në fitoren 4-1 ndaj Vasco da Gama, dhe tani pritet të nisë aventurën e re në Angli.

Allan Elias ishte gjithashtu në radarët e Napolit, Newcastle dhe Aston Villa, por Manchester City lëvizi më shpejt dhe arriti të mbyllë marrëveshjen.Marrëdhëniet e mira mes Manchester Cityt dhe Palmeiras kanë ndihmuar gjithashtu në përshpejtimin e negociatave. Tashmë, Allan Elias pritet të jetë një tjetër investim i rëndësishëm i klubit anglez për të ardhmen.