Mancini: Na pret sfidë e bukur me Anglinë, kemi besuar gjithmonë te arritja në finale!
Dy ditë para finales së Kampionatit Evropian mes Anglisë dhe Italisë, Roberto Mancini ka komunikuar me tifozët nëpërmjet rrjeteve sociale, ku ka ndalë emocionet e përjetuara dhe ka komentuar momente të caktuara gjatë këtij edicioni. “Do të jetë një ndeshje e bukur, pasi ata janë një skuadër shumë solide dhe kanë arritur me meritë deri këtu. Unë kam besuar gjithmonë se mund të arrijmë deri në finale, pasi kam besuar gjithmonë te gjërat pozitive, por kanë qenë futbollistët ata që kanë besuar më shumë, pasi nuk ka qenë aspak e lehtë”.
Përqafimi me Viallin dhe fitorja ndaj Belgjikës – “Viallin e përqafova pas golit të Chiesës ndaj Austrisë. Ishte ndeshja e parë me eliminim direkt dhe po vuanim jo pak në fushë, ndaj ai ishte një gol çlirues për ne në pankinë, por edhe për skuadrën në fushë. Ndaj Belgjikës goli i Insignes na dha shumë qetësi, ndonëse ajo penallti më pas rihapi ndeshjen. Nuk dua të hyj në polemika për penalltinë, por ishte një 11-metërsh që pa VAR edhe mund të jepej.
Penalltia e Jorginhos dhe festa me dedikim për Spinazzolën – “Ndaj Spanjës ishte një tjetër ndeshje e vuajtur, që e përballuam në mënyrën më të mirë. Jorginho është fantastik në ekzekutimin e 11-metërshave dhe kur erdhi radha e tij, të gjithë ishim shumë të qetë. Festuam me dedikim për Spinazzolën, pasi tregoi se është një nga anësorët më të mirë në botë, por fati nuk ishte me të, pasi u dëmtua në momentin më të mirë”.
