Trajneri i Kombëtares shqiptare, Rolando Maran, ka dalë në konferencë për shtyp në prag të ndeshjes me San Marinon, duke folur për gjendjen e skuadrës, zgjedhjet në formacion dhe paraqitjen e kuqezinjve në sfidën e fundit. Tekniku italian konfirmoi se në portë do të jetë Mario Dajsinani, ndërsa vlerësoi edhe grupin dhe mënyrën se si skuadra ka reaguar në fushë.
“Mendoj se kemi bërë një progres të mirë. Pasi kishim siguruar rezultatin me San Marinon, na u desh të bënim disa ndryshime. Mendoj se kemi bërë një ndeshje të mirë. Qëllimi im është që skuadra të aplikojë atë që kemi përgatitur. Jam i kënaqur me dëshirën e skuadrës”, deklaroi Maran.
Sa i përket sfidës së radhës, trajneri i Kombëtares theksoi se nuk ka ndeshje të lehta dhe kërkoi përqendrim maksimal nga skuadra.
“Nuk ka asnjë ndeshje të thjeshtë. Mund të ketë ndeshje më pak të vështira, por të thjeshta nuk ka”, u shpreh ai.
Maran foli edhe për situatën e portës, ku mungojnë Etrit Berisha dhe Thomas Strakosha, duke konfirmuar se mundësia këtë herë do t’i jepet Mario Dajsinanit.
“Të gjithë lojtarët mund të gabojnë. Te portierët është më deçizive. Por unë kam besim te të gjithë lojtarët. Më vjen keq që nuk e kam Berishën dhe as Sherrin. Mund të konfirmoj që do të luajë Mario Dajsinani. Është një mundësi e mirë për të”, tha trajneri italian.
Në konferencë nuk mungoi as referenca për Sabah Kerjotën. Maran pranoi se futbollisti i pëlqen dhe se mund të ketë hapësirën e tij në vazhdim, edhe pse konkurrenca në grup e ka bërë të vështirë aktivizimin e tij deri tani.
“Kerjota është një lojtar që më pëlqen dhe ka karakteristika që mund të ndihmojnë skuadrën. Më vjen keq që nuk i kam dhënë ende hapësirë. Nuk është një rast i djegur, sepse mund të ketë hapësira në vijim”, deklaroi Maran.
Trajneri u ndal më pas te paraqitja e Shqipërisë në ndeshjen me Finlandën, veçanërisht te reagimi i skuadrës pasi mbeti me 10 lojtarë. Sipas tij, kuqezinjtë treguan karakter dhe krijuan raste edhe në inferioritet numerik.
“Në 65 minuta që luajtëm në inferioritet numerik, kemi bërë shumë raste dhe u treguam shumë të rrezikshëm”, tha Maran.
Ai theksoi se mënyra e vendosjes së skuadrës në fushë dhe rolet e lojtarëve ndryshojnë në varësi të kundërshtarit dhe situatave që krijohen gjatë ndeshjes.
“Është fusha ajo që të jep zgjedhje në këto raste. Ndonjëherë janë kundërshtarët që të japin këto zgjedhje. Praktikisht, edhe roli ose detyrat e mesfushorit janë në varësi të mënyrës se si mbrohet skuadra tjetër”, shpjegoi trajneri.
Në fund, Maran zbuloi edhe mesazhin që u dha lojtarëve pas ndeshjes me Finlandën, duke kërkuar që kjo qasje të shërbejë si pikë referimi për vazhdimin.
“Kur mbaroi ndeshja, komplimentova lojtarët dhe i thashë të mbanin kokën lart. Duhet të vazhdojmë në këtë linjë. Kjo qasje duhet të jetë pas ndeshjeve, mënyra se si kemi bërë futboll në atë ndeshje”, përfundoi Maran.