Franca, një nga favoritët kryesorë për të fituar Kupën e Botës 2026, do të zbresë sot në fushë përballë Irakut me synimin e qartë për të siguruar që tani kualifikimin në fazën e 1/16-ave të finales. Në qendër të vëmendjes mbetet sërish Kylian Mbappé, lideri i “gjelave” dhe arma më e fortë e trajnerit francez.
Sulmuesi i Real Madridit vjen pas një paraqitjeje të shkëlqyer në ndeshjen ndaj Senegalit, ku realizoi dy gola dhe udhëhoqi Francën drejt një fitoreje të rëndësishme. Performanca e tij konfirmoi edhe një herë pse konsiderohet ylli kryesor i kombëtares franceze dhe një nga futbollistët më të mirë në botë. Në konferencën për shtyp para sfidës me Irakun, Mbappé u pyet për mundësinë e thyerjes së një tjetër rekordi.
“Nuk e di se për cilin rekord bëhet fjalë, por ndoshta po”, u përgjigj ai me humor, duke lënë të kuptohet se është gati të vazhdojë serinë e paraqitjeve të mëdha.
Sulmuesi francez komentoi edhe krahasimet e vazhdueshme me Cristiano Ronaldon, idhullin e tij të fëmijërisë, si dhe me Lionel Messin. Megjithatë, ai e bëri të qartë se nuk e sheh veten duke luajtur futboll në moshën 40-vjeçare, ashtu si portugezi.
“Nuk dua të luaj futboll deri në moshën 40-vjeçare. Në atë kohë ndoshta do të jeni ju ata që do të më largoni”, tha ai me shaka para gazetarëve.
Sa i përket objektivave të Francës në këtë Botëror, Mbappé theksoi se prioriteti i momentit është sigurimi i kualifikimit.
“Do të bëjmë gjithçka për t’u kualifikuar. Më pas, ndeshja e tretë do të jetë shumë e rëndësishme për renditjen në grup, pasi mund të përcaktojë rrugë të ndryshme në vazhdim të kompeticionit. Por tani për tani jemi të fokusuar vetëm te sfida e radhës”, deklaroi ylli francez.