Janë zhvilluar këtë mbrëmje tre nga shtatë ndeshjet e para të fazës play-off të Champions League, me të trija takimet që prodhuan sfida të luftuara dhe pa një fitues.
Në Sofje, kampionia e Bullgarisë, Levski Sofia, u ndal në barazimin 0-0 ndaj AEK-ut. Në formacionin titullar të skuadrës greke ishin dy futbollistët e Kombëtares shqiptare, Thomas Strakosha dhe Stavro Pilo, të cilët e nisën nga minuta e parë këtë përballje.
Më spektakolare ishte sfida e zhvilluar në Stamboll, ku Fenerbahce dhe Lyon u ndanë në barazimin 1-1. Francezët kaluan në avantazh në minutën e 40-të me Lois Openda, i cili shënoi golin e tij të parë me Lyon pas transferimit nga Juventusi.
Fenerbahce reagoi menjëherë pas pushimit. Në minutat e para të pjesës së dytë, Mason Greenëood, një nga blerjet më të bujshme të klubit turk gjatë kësaj vere, riktheu baraspeshën.
Të dyja skuadrat patën mundësi për të shënuar golin e fitores, por në dy raste shtylla i mohoi festën ekipeve. Për Fenerbahcen e nisi ndeshjen si titullar edhe sulmuesi shqiptar Vedat Muriqi.
Ndërkohë, në Zagreb, Dinamo nuk arriti të shfrytëzonte avantazhin e dyfishtë dhe barazoi 2-2 ndaj norvegjezëve të Viking. Skuadra kroate nisi furishëm dhe shënoi dy herë brenda katër minutash. Beljo realizoi në minutën e 6-të, ndërsa Lisica dyfishoi avantazhin në të 10-ën.
Viking reagoi shpejt dhe para pushimit arriti të rikthehej në lojë. Christiansen shënoi në minutën e 26-të, ndërsa Tripic barazoi shifrat në minutën e 39-të. Në pjesën e dytë, në minutën e 68-të, në fushë u aktivizua edhe anësori i Kombëtares shqiptare, Arbër Hoxha, por nuk arriti të gjente rrugën e rrjetës.
Ndeshjet e kthimit të këtyre përballjeve do të zhvillohen pas një jave, ku do të vendosen skuadrat që do të sigurojnë kualifikimin në fazën e ligës së Champions League.