Medalja e artë për Shqipërinë, mundësi Islam Dudaev shkruan histori në ”Taranto 2026”

Shqipëria ka shënuar një sukses të rëndësishëm në arenën ndërkombëtare, teksa Islam Dudaev ka triumfuar në Lojërat Mesdhetare ”Taranto 2026”, duke i dhuruar vendit medaljen e artë.

Dudaev u shpall kampion në kategorinë deri në 74 kilogramë, në stilin e lirë, pas një paraqitjeje të shkëlqyer gjatë garës. Në finalen e madhe, mundësi kuqezi u përball me Fati Vejselin, i cili përfaqëson Maqedoninë e Veriut.

Sfida finale nuk shkoi deri në fund, pasi Vejseli pësoi një dëmtim dhe nuk mundi të vijonte përballjen. Në këtë mënyrë, Dudaev siguroi medaljen e artë dhe ngjiti flamurin kuqezi në majën e podiumit. Ky sukses merr një rëndësi të veçantë për Shqipërinë, pasi përfaqëson një tjetër moment të spikatur të sportit shqiptar në një kompeticion të rëndësishëm ndërkombëtar.

Por Dudaev nuk ishte i vetmi mundës kuqezi që shkëlqeu në Taranto. Zelimkhan Abakarov siguroi medaljen e argjendtë në kategorinë deri në 65 kilogramë, duke arritur deri në finalen e madhe.

Në përballjen për medaljen e artë, Abakarov u mposht 4–2 nga turku Ahmet Duman. Shqipëria e mbyll këtë paraqitje me dy medalje në mundje, një të artë dhe një të argjendtë, në një tjetër ditë krenarie për sportin kuqezi.

 

View this post on Instagram

 

A post shared by Olympicalbania (@olympicalbania)