Merkato kuqezi në Europë, Cana e Gashi mes “enigmave” të mëdha

Merkatoja e verës ka dhuruar disa lëvizje surprizë të futbollistëve kuqezi janë shënuar deri tani, por gushti do të jetë një muaj edhe më i “nxehtë” sa i përket “etheve” të merkatos. Spikaste deri tani transferimi i Sokol Cikalleshit nga RNK Split te Basaksehir në Turqi, apo kalimi i Odise Roshit nga FSV Frankfurt te Rijeka. po ashtu lëvizje jo pak e bujshme ishte firma e Amir Abrashit me Eintrahtin e Frankfurtit. Së fundmi arritja e marrëveshjes mes Napolit dhe Empolit për kartonin e Elseid Hysajt del si kryefjalë e merkatos kuqezi. Një lajm shumë i mirë për kombëtaren është transferimi i Amir Rrahmanit te RNK Split. Po ashtu edhe Arbnor Fejzullahu mund të kalojë në një kampionat europian, nëse ofertat në drejtim të tij do të jenë të kënaqshme për drejtuesit e Partizanit. Gjithashtu mbetet i hapur transferimi i Taulant Xhakës tek Fiorentina, sikurse janë shtuar pretendentet për Shkëlzen Gashin nga ekipe të Seria A, po ashtu edhe në Bundesligë. Pescara ka blerë përfundimisht kartonin e mesfushorit  Ledian Memushajt nga Leçe, ndërsa Herolind Shala është dhënë në formën e huazimit nga Sparta e Pragës tel Slovan Liberec. Megjithatë mbeten për t’u mësuar e ardhmja e disa elementëve kryesore të formacionit të Gianni De Biasit, që kanë shkëputur gjatë verës marrëdhëniet me ekipet e tyre. Migjen Basha, pas ndarjes me konsensus me ekipin e Seria A, Torino, është aktualisht lojtar i lirë, edhe pse kohët e fundit janë shtuar zërat për një kalim të mundshëm të tij te Kievo. Mesfushori 28-vjeçar ka kërkuar më shumë kohë për të vendosur, pasi kërkon të bëjë zgjedhjen e duhur. Në pikëpyetje mbete edhe e ardhmja e mbrojtësit Andi Lila, i cili kaloi nga Pas Janina në Seria A dhe iu bashkua gjysmës së dytë të sezonit të fundit ekipit të Parmas, në Seria A. Një lojtar i lirë është edhe Arlind Ajeti, një prodhim i akademisë së Basel.  Edgar Çani la pas eksperiencën në Premier-ship me Leeds United dhe mbetet në merkato. Edhe pse u tentua nga Skënderbeu, mbrojtësi kuqezi preferon një eksperiencë në një kampionat më të fortë europian. Po ashtu, sulmuesi Hamdi Salihi pas eksperiencës evropiane me kampionët e Shqipërisë, Skënderbeut, pritet të vendosë për të ardhmen e tij nëse do të largohet sërish për të provuar një eksperiencë të huaj jashtë vendit.  Dhe “qershia mbi tortë” e merkatos kuqezi mbetur kapiteni i kombëtares sonë, Lorik Cana. Duket se Cana e ka mbyllur aventurën me Lazion, pasi nuk bën pjesë në planet e Piolit. Kapiteni kuqezi ka paralajmëruar një eksperiencë jashtë Europës, ku më pranë firmës me të duket se është klubi nga Katari Al Jaish.

A.      Muraçi