“Merru me punët e tua”, zbulohen detaje të reja nga skandali i arbitrimit në Itali

Skandali që po trondit arbitrimin italian po merr përmasa gjithnjë e më të mëdha. Sipas La Repubblica, hetimi i Prokurorisë së Milanos është mbështetur në dëshmitë e 29 arbitrave dhe ish-arbitrave të Serie A dhe Serie B, të cilët janë marrë në pyetje gjatë muajve të fundit.

Në qendër të akuzave është edhe ajo që disa dëshmitarë e kanë quajtur “sistemi Rocchi”, duke iu referuar Gianluca Rocchi, aktualisht drejtues i sektorit të arbitrimit. Sipas dëshmive, ai dyshohet se ka pasur kontakte të vazhdueshme telefonike me drejtues klubesh, ndonëse rregullorja nuk e lejon një gjë të tillë, me qëllim përfitimi personal dhe krijimin e marrëdhënieve të favorshme.

Në fokus të hetimit janë të paktën pesë ndeshje, por vëmendje e veçantë i është kushtuar sfidës Inter-Roma 27 prill 2025 dhe rolit të Andrea Gervasoni si mbikëqyrës.

Ish-ndihmës arbitri Domenico Rocca, në kallëzimin e tij, ka ngritur pikëpyetje për trajtimin e rasteve të ndryshme nga VAR-i. Ai përmend një episod të diskutueshëm, ku në një ndeshje tjetër është kërkuar ndërhyrje nga VAR-i, ndërsa në sfidën Inter-Roma nuk është sinjalizuar një penallti e qartë në favor të zikaltërve, një vendim që sipas tij mund të ketë ndikuar në garën për titull mes Inter dhe Napoli.

Gjithashtu, sipas raportimeve, gjatë një kontrolli të VAR-it për një kontakt mes lojtarëve Ndicka dhe Bisseck, një anëtar i stafit VAR ka sinjalizuar faull, por është përballur me një përgjigje refuzuese, që sipas dëshmisë mund të ketë ardhur me ndikimin e mbikëqyrësit Gervasoni.

Ndeshja në fjalë u gjykua nga Michael Fabbri, me Marco Di Bello në rolin e VAR-it dhe Marco Piccinini si AVAR. Audio nga dhoma e VAR-it nuk është bërë ende publike.