Milan ndalet nga Sassuolo, kuqezinjtë lënë dy pikë në garën për kreun

Milani nuk arriti të marrë maksimumin në “Mapei Stadium”, në ndeshjen e javës së 6-të të Serie A. Kuqezinjtë u ndalën në barazimin 1-1 nga Sassuolo, duke u ngjitur në kuotën e 12 pikëve.

Pjesa e parë u mbyll pa gola, me rezultatin 0-0. Loja u bë më e luftuar në 10 minutat e fundit të fraksionit të parë, kur Milani rriti presionin dhe u tregua më kërkues, por pa arritur të ndryshojë shifrat.

Në pjesën e dytë, kuqezinjtë kaluan në avantazh me anë të Rabiot, i cili përfitoi nga një asist i Luka Modriçit. Megjithatë, epërsia e Milanit zgjati vetëm pesë minuta, pasi Sassuolo riktheu baraspeshën me Odenthal.

Pas golit të pësuar, Milani reagoi dhe iu afrua sërish avantazhit me anë të Chukwueze, por gjuajtja e tij u ndal nga portieri Muric.

Në minutat e mbetura, asnjëra prej skuadrave nuk arriti të gjente golin e fitores. Kështu, sfida përfundoi në barazim 1-1, me Milanin dhe Sassuolon që ndanë nga një pikë..