Milani ka mbyllur marrëveshjen për Diego Moreiran. Sulmuesi i majtë belg, i cili në të kaluarën ishte lidhur edhe me Romën, pritet të jetë përforcimi i ri në repartin ofensiv të kuqezinjve. Sipas raportimeve nga Italia, marrëveshja me Strasburgun është arritur mbi bazën e 45 milionë eurove plus 5 milionë euro bonuse, ndërsa klubi francez do të përfitojë gjithashtu 10% të një shitjeje të ardhshme të futbollistit.
Moreira pritet të mbërrijë sot në Milano për t’iu nënshtruar vizitave mjekësore. Ai pritet të zbresë në aeroportin e Linate rreth orës 12:00, përpara se të hedhë firmën mbi kontratën e re me kuqezinjtë. Operacioni është ndërmjetësuar nga agjenti i tij, Jorge Mendes.
Në garë për lojtarin ishte edhe Leipzig, por gjermanët u tërhoqën pasi mësuan kërkesat ekonomike të Strasburgut. Kjo i dha mundësinë Milanit të përshpejtonte negociatat dhe të bindte lojtarin për projektin kuqezi.
I lindur në vitin 2004 në Liège, Moreira është një futbollist ofensiv me teknikë të lartë dhe shumë i rrezikshëm në duelet një kundër një. Ai mund të luajë në të dyja krahët, por preferon të futet në qendër për të goditur portën ose për të shërbyer asistime.
I formuar te Standard Liège, ai kaloi te Benfica në vitin 2020 dhe fitoi Youth League në sezonin 2021/22. Në vitin 2023 u transferua te Chelsea, ndërsa një vit më vonë firmosi përfundimisht me Strasburgun për 8.5 milionë euro. Me klubin francez, Moreira regjistroi 76 paraqitje dhe 7 gola në dy sezone.