Milani shkrin kupolën, nis një epokë të re! Ikën Allegri, Tare, Furlani dhe Moncada

AC Milan ka nisur një revolucion të thellë pas sezonit zhgënjyes dhe mungesës së kualifikimit në Champions League. Pronari i klubit, Gerry Cardinale, ka vendosur të ndryshojë tërësisht strukturën drejtuese dhe teknike të skuadrës kuqezi.

Klubi ka njoftuar largimin e trajnerit Massimiliano Allegri, drejtorit sportiv Igli Tare, administratorit ekzekutiv Giorgio Furlani dhe drejtorit teknik Geoffrey Moncada.

Në deklaratën zyrtare, drejtuesit e klubit theksuan se objektivi kryesor ishte rikthimi në elitën europiane dhe lufta për titullin kampion në Serie A.

Edhe pse skuadra qëndroi për një periudhë të gjatë mes ekipeve kryesuese, rezultatet negative në javët e fundit dhe humbja vendimtare në fund të sezonit bënë që projekti të konsiderohej i dështuar.

Tashmë te Milani pritet të nisë një epokë e re, me ndryshime të mëdha në pankinë dhe në drejtimin sportiv të klubit.