Momente prekëse në Botëror, Gakpo mes lotësh i dedikon golin fëmijës së humbur

Sulmuesi i Holandës, Cody Gakpo, përjetoi një nga momentet më emocionuese të karrierës së tij gjatë ndeshjes ndaj Marokut, vetëm pak ditë pasi partnerja e tij njoftoi humbjen e fëmijës që prisnin.

Në një periudhë të vështirë personale, futbollisti i Liverpoolit vendosi të qëndrojë me kombëtaren holandeze pas konsultimeve me familjen dhe stafin teknik. Trajneri Ronald Koeman i besoi një vend në formacionin titullar për përballjen ndaj Marokut.

Në mesin e pjesës së dytë, Gakpo realizoi golin që në atë moment dukej se do t’i siguronte Holandës kualifikimin. Pas realizimit, ai u përqafua nga shokët e skuadrës, mes tyre kapiteni Virgil van Dijk, në një gjest solidariteti dhe mbështetjeje për situatën që po kalon.

Megjithatë, Maroku arriti të barazojë më vonë, ndërsa emocionet e forta e pushtuan sulmuesin holandez. Pas vërshëllimës së fundit, Gakpo u ul në fushë mes lotësh, i prekur nga ngarkesa emocionale e ditëve të fundit.

Pamja më prekëse erdhi në momentin e festimit të golit, kur 27-vjeçari ngriti duart drejt qiellit, në një dedikim të veçantë për fëmijën që ai dhe partnerja e tij nuk arritën ta sillnin në jetë.

Gesti i tij preku tifozët dhe opinionin sportiv, duke e kthyer golin në një nga momentet më emocionale të këtij Botërori.