José Mourinho ka dhënë konferencën e tij të parë për shtyp si trajner i Real Madridit, duke folur për disa prej temave më të rëndësishme të aventurës së tij të re në “Santiago Bernabéu”.
Një prej momenteve më interesante lidhej me Yan Diomanden, talentin e ri të afruar gjatë verës. Sulmuesi kishte deklaruar më herët se ishte gati të “vdiste” për Mourinho, një shprehje që nuk kaloi pa u komentuar nga trajneri portugez.
Mourinho e vlerësoi pasionin e 20-vjeçarit, por menjëherë e korrigjoi mesazhin, duke theksuar se prioriteti duhet të jetë skuadra dhe jo një individ.
“Pa e ndjekur fjalë për fjalë atë që ka thënë, është një shprehje që më pëlqen. Por do të më pëlqente edhe më shumë që ai të jepte gjithçka për grupin, për Real Madridin”, u shpreh Mourinho.
Trajneri portugez theksoi se përkushtimi i vërtetë nuk matet me deklarata, por me atë që lojtarët bëjnë çdo ditë në stërvitje dhe në fushë.
“Fjalët janë të lehta, ndërsa më e vështirë është t’i kthesh ato në veprime”, deklaroi Special One.
Mourinho gjithashtu nënvizoi se Diomande nuk është një rast i veçantë në dhomën e zhveshjes së Real Madridit. Sipas tij, i gjithë grupi po tregon të njëjtin mentalitet dhe dëshirë për sukses.
“Fjalët e tij nuk janë ndryshe nga ajo që shoh te të gjithë lojtarët e tjerë. Shoh një grup të angazhuar dhe me dëshirë për të bërë mirë”, përfundoi trajneri madrilen.