Mourinho flet për të ardhmen: Benfica më ofroi rinovimin, nuk kam pasur kontakt me Real Madrid

Trajneri portugez Jose Mourinho ka konfirmuar se ka marrë një ofertë për rinovimin e kontratës nga Benfica, por ende nuk ka marrë një vendim për të ardhmen e tij. Gjatë një konference për shtyp, “Special One” zbuloi se oferta i është dorëzuar agjentit të tij, ndërsa ai vetë ka preferuar të mos e shqyrtojë ende.

“Po, të mërkurën mora një ofertë për rinovimin e kontratës nga Benfica. Oferta i është dorëzuar agjentit tim, por nuk kam dashur ta shoh, ta njoh apo ta analizoj. Do ta bëj këtë vetëm duke filluar nga e diela”, deklaroi Mourinho.

Tekniku portugez hodhi poshtë gjithashtu zërat për një rikthim të mundshëm te Real Madrid, duke theksuar se nuk ka marrë asnjë kontakt nga drejtuesit e klubit madrilen.

“Sa i përket Real Madridit, askush nuk më ka thënë ndonjëherë se kishte një ofertë për të më treguar. As presidenti dhe as ndonjë person i rëndësishëm i klubit. Por edhe nëse do të më kishin kontaktuar, përgjigjja ime do të kishte qenë e njëjtë”, u shpreh Mourinho.

Në fund, trajneri theksoi se java e ardhshme do të jetë vendimtare si për të ardhmen e tij personale, ashtu edhe për planet e Benfica-s.

“Java e ardhshme do të jetë e rëndësishme për mua, për të ardhmen time dhe gjithashtu për Benfica-n. Kur të përfundojë sezoni, klubi duhet të nisë të mendojë për sezonin e ardhshëm. Sipas kontratës dhe marrëveshjes që firmosa kur erdha, kemi këto pak ditë për të vlerësuar situatën dhe për të marrë një vendim”, përfundoi Mourinho.