Jose Mourinho ka folur me superlativa për Barcelonën dhe talentin e saj, Lamine Yamal, por ka bërë të qartë se nuk do të dëshironte ta kishte sulmuesin e ri në skuadrën e Real Madridit.
Trajneri portugez, i rikthyer në drejtimin e Real Madridit, foli për rivalët e përjetshëm në një intervistë për “El Chiringuito”, duke vlerësuar punën e bërë nga Hansi Flick, drejtori sportiv Deco dhe futbollistët katalanas.
“Barcelona është një skuadër e madhe, Lamine Yamal është një kampion, por ne nuk kemi nevojë për të. Nuk do të doja ta kisha”, u shpreh Mourinho.
Special One nuk i kurseu elozhet për 19-vjeçarin, duke theksuar potencialin e madh që ka për të ardhmen.
“Më pëlqen, më pëlqen. Është bërë një punë shumë e mirë nga Flick, Deco dhe sigurisht nga lojtarët. Më pëlqen gjithçka që po bëjnë”, deklaroi ai.
Mourinho theksoi se Yamal ka ende shumë hapësirë për t’u përmirësuar, ndërsa vlerësoi arritjet e tij në një moshë kaq të re.
“Yamal? Nuk do të doja ta kisha. Pa dyshim që është një lojtar i ri me një hapësirë të jashtëzakonshme për t’u rritur. Nuk është diçka që mund ta bëjë kushdo, të jetë kampion Europe dhe bote në moshën 19-vjeçare”, shtoi trajneri madrilen.
Megjithatë, Mourinho beson fort te grupi që ka në dispozicion te Real Madridi. Pas një merkatoje të rëndësishme dhe ndryshimeve në skuadër, portugezi është i bindur se nuk ka nevojë për përforcime të tjera.
“Ne kemi një skuadër të një niveli shumë të lartë. Në këtë moment nuk do t’i bëja vend askujt tjetër. Këta janë djemtë e mi dhe djemtë e mi janë më të mirët”, përfundoi Mourinho.
Fjalët e trajnerit portugez vijnë në një moment kur sezoni i La Ligës sapo ka nisur, ndërsa Reali i Madridit synon të rikthehet te trofetë pas revolucionit të bërë në skuadër.