Mourinho pas fitores ndaj Interit: Mund të përfundonte 5-1 ose 6-6, goli i Valverdes jo rastësi

Trajneri i Real Madridit, José Mourinho, foli në konferencën për shtyp pas fitores ndaj Interit, në një ndeshje të luftuar dhe me shumë raste për shënim. Tekniku portugez pranoi se rezultati mund të kishte qenë edhe më i thellë, duke theksuar megjithatë se nuk ishte plotësisht i kënaqur me mënyrën se si skuadra e kontrolloi takimin.

“Ky takim mund të kishte përfunduar 5-1 për ne ose 6-6. Nuk them se Interi mund të fitonte, sepse ne krijuam shumë më tepër raste, por preferoj të kem kontroll absolut të ndeshjes dhe të mos më duhet të mbështetem te një portier që bën pritje të jashtëzakonshme”, deklaroi Mourinho.

Mourinho u ndal edhe te goli i Federico Valverdes, duke zbuluar se realizimi ishte pjesë e strategjisë së përgatitur para ndeshjes.

“Goli i Valverdes nuk ishte rastësi. Ishte një interpretim i shkëlqyer i strategjisë që kishim përgatitur. Nuk mund t’i shkëpus fjalët e mia nga konteksti, sepse luajtëm ndaj një skuadre të madhe dhe patëm një mijë mundësi”, u shpreh ai.

Sipas Mourinhos, diferenca në mundësitë për të bërë zëvendësime ndikoi gjithashtu në zhvillimin e takimit.

“Ata bënin zëvendësime, ndërsa unë nuk mundesha. Ishte një ndeshje jashtëzakonisht e vështirë. Jam i bindur se do të kualifikohemi, por këto tri pikë në fillim janë shumë të rëndësishme”, theksoi portugezi.

Në fund, Mourinho pati edhe fjalë të mëdha për Interin, duke e cilësuar si skuadrën më të fortë në Itali.

“Interi është një skuadër elitare, pa diskutim më e mira në Itali. Vetëm Roma ka fuqinë fizike për të bërë presing dhe për të qëndruar pranë tyre, ndoshta edhe për të bërë diçka të jashtëzakonshme”, tha ai.

Mourinho kujtoi edhe ecurinë e fundit të zikaltërve në Champions League.

“Interi ka luajtur dy finale të Champions League në katër vitet e fundit dhe sigurisht që ka ambicien për ta fituar trofeun. Kanë një trajner të mirë dhe janë një skuadër perfekte për të bërë gjëra të mëdha”, përfundoi ai.