Rodrigo Mora po përjeton një muaj të artë, duke shënuar golin e tretë radhazi dhe duke festuar thirrjen e tij në Kombëtaren e Portugalisë, në epokën pas Cristiano Ronaldos. Ky muaj i jashtëzakonshëm e ka parë Morën të jetë vendimtar, siç ndodhi edhe dje kundër Sassuolos. Me vetëm 19 vjeç, ai ka një statistikë mbresëlënëse këtë sezon: 4 gola dhe 2 asiste mes kampionatit dhe Champions League, një arritje që pak bashkëmoshatarë mund ta kenë. Talenti i ri ka shuar çdo dyshim të atyre që e shihnin si shumë të imët, të papjekur, apo që nuk kishin durim me të rinjtë. “Jo gjithçka shkonte mirë një muaj më parë, por gjërat ndryshojnë,” pranoi Rodrigo dje, duke reflektuar mbi transformimin e tij.
Trajneri Gasperini nuk ka pasur kurrë dyshime për potencialin e tij, duke e konsideruar gjithmonë një lojtar “superior” dhe duke e krahasuar indirekt me talentet më të mëdha nën 20 vjeç në botë. Thjesht i duhej pak kohë, dhe në fakt, i është dashur edhe më pak se sa pritej. Performanca e tij super e ka ngjitur në vendin e dytë mes golashënuesve të verdhekuqve, pas Malenit, me tetë gola. Ata që mendonin se nuk ishte gati për skenat më të mëdha, janë detyruar të ndryshojnë mendim. Në “Old Trafford”, në pjesën e parë, Mora mori duartrokitje të shumta, duke tërhequr vëmendjen edhe të Jorge Jesus, trajnerit të Kombëtares së madhe të Portugalisë.
Në fakt, Mora kërkoi pak durim. Djali nga Porto u përshtat menjëherë me futbollin e Gasperinit, duke qenë ndër më të mirët në dy ndeshjet e para kundër Fiorentinës dhe Leçes. Më pas, diçka shkoi keq: stolat e parë, pak pakënaqësi dhe kritika. Për çfarë? Në të vërtetë, për pak gjë, pasi Rodrigo u përdor pak deri në dëmtimin e Dybalës. Por më pas, ai djalë nga Porto mori skenën. Përvoja, pavarësisht moshës së re, nuk i mungonte aspak. Me fanellën e “Dragones” (Porto), në një stadium aspak provincial, Mora kishte debutuar në moshën 15 vjeç, 8 muaj e 10 ditë, duke u bërë debutuesi më i ri në historinë e futbollit profesionist portugez.
Që nga ai moment, rritja e tij ishte shumë e shpejtë. Më 25 shtator 2024, ai bëri debutimin e tij në ekipin e parë, në ndeshjen e Europa League kundër Bodo/Glimt. Muajin pasues debutoi edhe në kampionat dhe, pak javë më vonë, shënoi golin e parë në ligën kryesore portugeze kundër AVS. Sezonin 2024/25 e mbylli me 12 gola dhe 4 asiste në 40 paraqitje, dy prej të cilave pikërisht kundër Romës në Europa League. PSG kishte vënë sytë mbi të, por Porto nuk donte ta shiste menjëherë “perlën” e saj.
Vitin e kaluar, me ardhjen e Fariolit në stol, gjërat nuk shkuan shumë mirë. Mora luajti 44 ndeshje, por startoi titullar vetëm 19 herë dhe shpesh u zëvendësua, aq sa mesatarja e tij e minutave për ndeshje ishte 42.2. Ai e mbylli sezonin me 5 gola dhe dy asiste, pasi Farioli i preferonte Gabri Veiga-n dhe e relegonte në rolin e mesfushorit të brendshëm (mezz’ala), jo pikërisht zona e tij e rehatisë. Këtë e kuptoi Gasperini, i cili e përdor më afër portës. Dhe në verë, falë edhe ndihmës së super agjentit Mendes, klubi verdhekuq kaloi konkurrencën dhe siguroi Rodrigo-n me një operacion që pa shpenzimin e “vetëm” 25 milionë eurove. 25 milionë të tjerë, të mundshëm, nuk do të shërbejnë për të shpenguar lojtarin, i cili në fakt është tashmë plotësisht i Romës, por për të siguruar 100% të të drejtave komerciale në rast rishitjeje. Këto janë biseda për të ardhmen. E tashmja thotë se Mora është bërë një nga shumë “perlave” në thesarin e Gasperinit dhe të një Rome që ka shënuar tashmë 31 gola në kampionat dhe që tani ëndërron titullin.
Marrë nga La Gazzetta dello Sport