Muçi-Onuachu, dyshja më efektive në Superligën Turke

Forma e shkëlqyer e Ernest Muçi po ndihmon Trabzonspor të rikthehet fuqishëm në garën për objektivat e mëdha në Superligën Turke. Skuadra nga Trabzoni po lufton për pozicionet e para në kampionat dhe për një vend në UEFA Champions League, ndërsa kontributi i sulmuesit shqiptar po rezulton vendimtar.

Muçi po kalon një moment shumë pozitiv në kampionatin turk, ku ka realizuar 10 gola deri tani, duke u shndërruar në një nga lojtarët më të rëndësishëm të skuadrës.

Sipas mediave turke, sulmuesi shqiptar së bashku me partnerin e tij të repartit ofensiv, Paul Onuachu, formojnë aktualisht dyshen më produktive të kampionatit. Të dy lojtarët e Trabzonspor kanë shënuar së bashku plot 30 gola në sezon.

Kjo shifër i vendos ata në krye të një klasifikimi të veçantë të dysheve sulmuese në Turqi. Pas tyre në këtë renditje vjen dyshja e Fenerbahçe, e përbërë nga Anderson Talisca dhe Marco Asensio, që kanë realizuar së bashku 24 gola.

Në podium renditet edhe çifti ofensiv i Galatasaray, me Mauro Icardi dhe Victor Osimhen, të cilët gjithashtu kanë arritur kuotën e 24 golave. Performanca e dyshes Muçi–Onuachu po konsiderohet një nga faktorët kryesorë që ka rikthyer Trabzonspor në garë për trofe dhe për një vend në kompeticionet më të rëndësishme europiane.