Kombëtarja e vajzave ka nisur përgatitjet për dy sfidat vendimtare ndaj Qipros, të vlefshme për fazën play-out të UEFA Nations League. Këtë të hënë vajzat zhvilluan stërvitjen e radhës në kuadër të këtij grumbullimi, teksa grupi nuk është ende i plotë dhe pritet të kompletohet në seancën e pasdites. Në një prononcim për fshf.org, trajneri i skuadrës, Armir Grima shprehet optimist për këto ndeshje dhe të njëjtën gjë sheh edhe tek ekipi që drejton.
“E kemi pritur këtë ditë që të vijmë në këtë nivel. Besoj që do japim maksimumin. Unë jam shumë optimist dhe shoh shumë optimizëm edhe te vajzat, shoh dëshirë dhe grintë. Është momenti i duhur që ne të vazhdojmë të qëndrojmë në Ligën B sepse besoj se e meritojmë. Edhe me rezultate, edhe me lojë dhe besoj se jemi të denjë të vazhdojmë në Ligën B. Kemi fat se shumë vajza po na luajnë jashtë Shqipërisë, në klube të huaja. Është shtuar shumë kontingjenti. Është fat, pasi stërvitja është më sistematike, më e rregullt, sepse vajzat janë të përgatitura mirë fizikisht. Shoh dëshirë te vajzat. Kjo më ngroh dhe shoh optimizëm për t’i kaluar këto dy sfida me sukses”, shton ndër të tjera profesor Grima.
Tekniku kuqezi flet edhe për kundërshtarin, ndërsa nënvizon se në këto sfida skuadra jonë duhet të luftojë me veten dhe mos t’i marrë si ndeshje të lehta. “E kemi studiuar, e dimë kush është Qipro. Besoj se ashtu na kanë studiuar edhe ato ne. Ne duhet të luftojmë me vetveten dhe mos të mendojmë që kjo është ndeshje e lehtë, sepse është shumë e rëndësishme. T’i japim vlerësimin që i takon këtyre ndeshjeve dhe të bëjmë hapin e madh te futbolli i vajzave sepse do të jetë një sukses i madh nëse ne vazhdojmë të rrimë në Ligën B”, përfundon prononcimin për fshf.org trajneri Armir Grima.
Shqipëria do të luajë më 24 tetor, në orën 18:00, ndeshjen e parë kundër Qipros në Larnaca. Ndeshja e kthimit do të luhet në stadiumin “Air Albania” më 28 tetor, në orën 18:00. Ndeshjet kundër Qipros konsiderohen si finale për ekipin kuqezi të vajzave, të cilat kërkojnë të ruajnë statusin e tyre në Ligën B dhe të vijojnë rrugëtimin në këtë nivel.