Trajneri anglez është rikthyer në qendrën stërvitore të klubit, ndërsa drejtuesit e Manchester United ende nuk kanë bërë të ditur një vendim për të ardhmen e tij pas humbjes së rëndë ndaj Bournemouth.
Michael Carrick është paraqitur këtë mëngjes në qendrën stërvitore të Carrington, në një moment kur e ardhmja e tij në stolin e Manchester United mbetet e paqartë.
Tekniku anglez mbërriti pak para orës 08:00, i veshur me kostumin sportiv të klubit. Ndërkohë, skuadra e parë pritet të rikthehet në stërvitje pas ditës së pushimit të dhënë të hënën, pas humbjes 3-0 në shtëpi ndaj Bournemouth të dielën.
Sipas planit aktual, është pikërisht Carrick ai që pritet të drejtojë seancën stërvitore të ditës, në pritje të një komunikimi zyrtar nga drejtuesit e klubit për të ardhmen e tij në krye të skuadrës.
Pavarësisht spekulimeve dhe presionit të shtuar, trajneri nuk ka ndryshuar rutinën e tij të përditshme. Edhe një ditë më parë, ai ishte paraqitur në Carrington për të ndjekur nga afër ndeshjen e ekipit U21 të Manchester United kundër Hull Cityt.
Carrick e ndoqi takimin nga tribunat, së bashku me pjesën më të madhe të stafit të tij teknik. Prania e vazhdueshme në qendrën stërvitore tregon se trajneri po vijon detyrat e tij profesionale, ndërsa situata mbetet e tensionuar si në aspektin sportiv, ashtu edhe në atë drejtues.