Në Spanjë janë të bindur: Lautaro ka arritur marrëveshje me Barcelonën!

Barcelona ka nisur të konkretizojë interesimin për Lautaro Martinez, ndërsa sulmuesi argjentinas po shfaqet gjithnjë e më shumë si alternativa kryesore e klubit katalanas për repartin ofensiv.

Sipas raportimeve të “El Chiringuito TV”, gjatë javës së kaluar është zhvilluar një takim mes drejtorit sportiv të Barcelonës, Deco, dhe agjentit të Lautaro Martinez, Alejandro Camano. Takimi, sipas mediave spanjolle, ka përfunduar me një marrëveshje paraprake për kushtet personale të sulmuesit.

Lëvizja e Barcelonës vjen në një moment kur operacioni për Julián Álvarez po bëhet gjithnjë e më i komplikuar. Sulmuesi i Atlético Madrid mbetet një prej objektivave të klubit, por qëndrimi i fortë i drejtuesve madrilenë ndaj një transferimi te Barcelona ka vështirësuar ndjeshëm negociatat.

Në këtë situatë, Lautaro është ngjitur në listën e prioriteteve të drejtuesve katalanas. Barcelona raportohet se është e gatshme të bëjë një investim të rëndësishëm financiar për të bindur Interin të negociojë largimin e kapitenit të tij.

Një ofertë rreth 100 milionë euro do ta vendoste klubin zikaltër përballë një dileme të madhe. Lautaro është kapiteni dhe një prej futbollistëve më të rëndësishëm të skuadrës, por një shumë e tillë do të ishte e konsiderueshme për financat e klubit.

Megjithatë, një tjetër faktor që mund ta komplikojë situatën është koha. Me merkaton pranë fundit, një largim i Lautaros në ditët e fundit të afatit do ta linte Interin me shumë pak hapësirë për të gjetur një zëvendësues të denjë.

Nga Italia vazhdojnë të vijnë sinjale se Interi nuk ka ndërmend të heqë dorë lehtësisht nga kapiteni i tij. Por nëse Barcelona vendos në tavolinë një ofertë të përafërt me 100 milionë euro dhe Lautaro shfaq vullnetin për t’u transferuar në Katalonjë, situata mund të marrë një kthesë të papritur.