Netflix futet në botën e futbollit, siguron të drejtat televizive të Botërorit 2030

Netflix hyn në një epokë të re në transmetimin e futbollit, pasi ka siguruar të drejtat ekskluzive për Kupën e Botës 2030 në Spanjë dhe Andorrë. Platforma amerikane do të transmetojë drejtpërdrejt të 104 ndeshjet e turneut, duke shënuar për herë të parë hyrjen e saj në transmetimin e një Botërori për meshkuj.

Marrëveshja përfaqëson një hap të rëndësishëm në strategjinë e Netflix për të zgjeruar praninë në tregun e sportit, ndërsa tifozët në dy vendet europiane do të kenë mundësi të ndjekin të gjithë kompeticionin përmes platformës.

Përveç transmetimit të ndeshjeve, Netflix ka planifikuar një mbulim të gjerë, me programe para dhe pas takimeve, analiza gjatë pushimit mes pjesëve, si dhe përmbledhje të përditshme me momentet më të rëndësishme të turneut.

Një pjesë e përmbajtjes do të jetë e disponueshme falas për publikun në Spanjë. Sipas marrëveshjes, një ndeshje në ditë do të transmetohet pa pagesë në platformë, ndërsa një rrjet televiziv kombëtar do të ketë të drejtën të shfaqë një paketë takimesh, ku përfshihen të gjitha ndeshjet e Spanjës, gjysmëfinalet dhe finalja.

Botërori 2030 do të ketë një domethënie të veçantë, pasi përkon me 100-vjetorin e kompeticionit. Spanja, Portugalia dhe Maroku do të jenë vendet kryesore pritëse, ndërsa Argjentina, Uruguai dhe Paraguai do të organizojnë disa ndeshje simbolike.