Neymar i jep fund aventurës me Brazilin: Koha ime me Seleçaon ka përfunduar!

Neymar ka konfirmuar zyrtarisht largimin nga kombëtarja e Brazilit pas eliminimit të Seleçaos në fazën e 1/8-ave të Kupës së Botës 2026 ndaj Norvegjisë.

Sulmuesi brazilian, i cili hyri në fushë nga stoli dhe shënoi me penallti në minutat e fundit të ndeshjes, u largua nga fusha mes lotësh. Pas përfundimit të takimit, 34-vjeçari bëri të ditur se nuk do të veshë më fanellën e kombëtares.

“Koha ime me Brazilin ka përfunduar. Kam bërë histori, kam qenë shumë i lumtur dhe kam dhënë gjakun e jetën time për këtë fanellë. Gjithmonë kam luftuar për këtë fanellë të verdhë, por tani nuk dua të vazhdoj më”, deklaroi Neymar.

Me këtë vendim, lojtari mbyll një kapitull 16-vjeçar me kombëtaren braziliane. Neymar largohet si golashënuesi më i mirë në historinë e Brazilit, duke lënë pas një trashëgimi të rëndësishme me Seleçaon, pavarësisht se nuk arriti të fitojë një Kupë Bote.

Ndërkohë, ylli brazilian foli edhe për polemikat e fundit te Santos, duke mohuar se ka kritikuar apo sulmuar lojtarët e rinj të skuadrës pas barazimit ndaj Chapecoenses.

“Ishte diçka e trishtueshme dhe bezdisëse. Pas ndeshjes kërkova që të përmirësoheshim dhe thashë se nuk mund të luanim në atë mënyrë sipërfaqësore. Si kapiten kam të drejtë ta them këtë”, u shpreh Neymar.