Stavros Pilo po përjeton momentin më të rëndësishëm të karrierës së tij. Mbrojtësi i majtë i AEK-ut të Athinës ka tërhequr vëmendjen e mediave greke, pasi ka gjetur rrugën e rrjetës në Champions League, fillimisht ndaj Manchester Cityt dhe së fundmi edhe kundër Real Madridit.
Edhe pse skuadra greke nuk arriti të merrte pikë në këto përballje, paraqitjet e futbollistit me origjinë shqiptare kanë bërë që emri i tij të zërë vend në titujt e gazetave sportive në Greqi. Në moshën 25-vjeçare, Pilo po shndërrohet në një prej zbulimeve interesante të këtij sezoni, ndërsa tashmë ka fituar edhe një vend në Kombëtaren shqiptare.
Rrugëtimi i tij drejt këtij suksesi ka qenë i veçantë. Hapat e parë në futboll i hodhi në ishullin e Rodosit, ku deri në moshën 13-14 vjeç luante si sulmues krahu. Në atë periudhë admironte futbollistë si Marcelo dhe Andrew Robertson, të cilët duket se kanë ndikuar edhe në profilin e tij si lojtar.
Më pas kaloi te grupmoshat e PAS Janinës, ndërsa sot është pjesë e AEK-ut, ku po fiton gjithnjë e më shumë vëmendje në arenën ndërkombëtare.
Pas ndeshjes me Real Madridin, Pilo vlerësoi paraqitjen e skuadrës, duke theksuar se AEK-u luftoi si i barabartë dhe se përballje të tilla shërbejnë për të mësuar e për t’u përmirësuar.
“Ne luftojmë në çdo ndeshje, pavarësisht nëse përballë kemi Real Madridin apo Comon. Do të vazhdojmë ta bëjmë këtë”, u shpreh futbollisti. Nga fushat modeste të Rodosit deri te netët e mëdha evropiane, historia e Stavros Pilos është një tjetër dëshmi e një karriere që po merr një drejtim gjithnjë e më premtues.