Nico Williams refuzon Arsenalin dhe Barcelonën, merr vendimin befasues

Pavarësisht interesimit të madh nga gjigantët evropianë si Arsenal, Chelsea dhe Barcelona, Nico Williams ka marrë një vendim befasues për të ardhmen e tij. Sulmuesi spanjoll duket se ka zgjedhur të mos ndjekë rrugën e transferimeve të bujshme, por të qëndrojë besnik ndaj Athletic Bilbaos.

Sipas raportimeve të fundit, 21-vjeçari është shumë pranë rinovimit me klubin bask, me një kontratë afatgjatë që mund të konsiderohet “përjetshme”. Ky vendim vjen pavarësisht se klubet e interesuara ishin gati t’i ofronin paga më të larta dhe mundësi për të luajtur në kompeticionet më të mëdha evropiane.

Me rinovimin, klauzola e largimit të Nico Williams pritet të rritet në 90 deri në 100 milionë euro, që e bën edhe më të vështirë largimin e tij në të ardhmen e afërt. Ky veprim tregon jo vetëm përkushtimin e lojtarit ndaj klubit që e rriti, por edhe një mesazh të qartë për ata që besojnë ende te vlerat e qëndrueshmërisë në futboll.