“Nuk dua të vazhdoj më këtu”, Muric konfirmon largimin nga Sassuolo

Portieri i Kosovës, Arijanet Muric, ka bërë të ditur se aventura e tij me US Sassuolo Calcio do të përfundojë në fund të sezonit aktual. Në një deklaratë për gianlucadimarzio.com, gardiani kosovar konfirmoi se nuk dëshiron të vazhdojë më te skuadra italiane për arsye personale.

“I kam bërë të ditur klubit se nuk dua të qëndroj më këtu pas këtij sezoni për motive personale”, deklaroi Muric.

Portieri 26-vjeçar ndodhet te Sassuolo në formë huazimi nga Ipswich Town dhe me përfundimin e huazimit do të mbyllet automatikisht edhe eksperienca e tij në Itali.

“Me përfundimin e huazimit, mbaron edhe koha ime këtu”, shtoi ai.

Gjatë këtij sezoni, Muric ka zhvilluar 32 ndeshje me fanellën e Sassuolos, duke pësuar 43 gola, ndërsa në shumë raste është vlerësuar për paraqitjet e tij të sigurta në portë.